Datganiad I'r Wasg

Ymysg y digwyddiadau a gweithgareddau a gynhelir yng Nghanolfan Siopa Aberafan bydd lansio Apêl Pabi Coch Lleng Prydeinig Brenhinol Port Talbot a chysegru’r Ardd Gofio –sydd eleni wedi’i dylunio fel gardd i goffau 80-mlwyddiant D-Day. Cynhelir seremoni codi baner gan ddechrau am 10.45am, gan gynnwys y Caniad Olaf a dau funud o dawelwch am 11am.

Rywbryd rhwng 11.15am a 11.30am mae’r Fyddin yn cynllunio rhoi syrpreis cerddorol i bawb. Dilynir hyn gan seremoni cyflwyno gwobrau mewn dwy gystadleuaeth gelf i blant. Fe wnaeth ‘Celfyddyd bod yn Blentyn Milwrol’ a ‘Celfyddyd D-Day’ wahodd plant a phobl ifanc i gyflwyno cerdd, stori fer, neu lun ar y pynciau hyn. Cafwyd dros 50 o geisiadau. Noddwyd y gwobrau gan Llanelec Precision Engineering, Wall Colmonoy, a’r Bathdy Brenhinol.

Bydd seremoni arwyddo Cyfamod y Lluoedd Arfog ar ran Canolfan Siopa Aberafan a Tai Tarian. Mae'r Cyfamod yn addewid gan y genedl sy'n sicrhau bod y rheini sy'n gwasanaethu neu sydd wedi gwasanaethu yn y Lluoedd Arfog, a'u teuluoedd, yn cael eu trin yn deg a'u bod ddim dan anfantais yn eu bywydau bob dydd.

Bydd rhaglen y prynhawn yn cynnwys Clwb Iwceleli Abertawe a’r pibydd Ioan Osborne. Am  12pm bydd Llyfrgell Port Talbot, a leolir ar lawr cyntaf y ganolfan siopa, yn cyflwyno sgwrs ar hanes a gwaith parhaus Comisiwn Beddau Rhyfel y Gymanwlad, gyda sylw arbennig i rai a gollwyd o Gastell-nedd Port Talbot.

Drwy gydol y dydd bydd hefyd sgyrsiau gan yr hanesydd milwrol lleol, Phil Barrow, a chyfle i wisgo dillad o’r cyfnod o flaen cefnlen yr Ail ryfel Byd gyda Gweithdy Rhyfel Byd Cymru, a fydd hefyd yn arddangos eitemau hanesyddol. Os oes gennych chi unrhyw gwestiwn am yr Ail Ryfel Byd, piciwch draw i gael sgwrs gyda nhw.

I ymwelwyr iau, bydd Gwasanaeth Ieuenctid CnPT yn cynnig gweithgareddau rhad ac am ddim.

Bydd pedair baner a wnaed o rwyd scrim milwrol yn hongian o nenfwd y ganolfan siopa. Defnyddir rhwydi fel hyn yn draddodiadol i guddliwio milwyr ar gyrchoedd, ond fe’i addurnir ar gyfer yr ŵyl â thros 1,500 blodyn pabi a gafodd eu gweu, eu crosio a’u crefftio â ffelt gan ysgolion, grwpiau gwau ac unigolion o bob cwr o’r fwrdeistref sirol a’r cyffiniau.

Ynghyd â hyn oll, bydd yno 25 stondin wybodaeth.

Tu fas, bydd y Sgwâr Dinesig yn gartref i arddangosfa o gerbydau gwasanaeth milwrol a brys, gan gynnwys Wagen Adfer Cerbydau Milwrol MAN, Land Rovers, Jeeps hanesyddol, beiciau modur, Tanc Cerbyd Rhagchwilio Ymladd (CVRT), a Chludwr Arfau Dodge. Mae’n siŵr mai un o’r uchafbwyntiau fydd pâr o Lochesi Anderson – gall ymwelwyr fynd i mewn i un i gael blas ar eu maint, ac mor fach oedden nhw, tra bo’r llall wedi’i osod fel pe bai ar fin croesawu teulu i gysgodi ynddo. Bydd arbenigwr ar gael hefyd i esbonio mwy am fywyd yn ystod y Blitz.

Mae trefnu’r digwyddiad, sy’n rhan o Ŵyl Lluoedd Arfog Maer Castell-nedd Port Talbot, wedi bod yn ymdrech bartneriaeth go iawn rhwng Cyngor Castell-nedd Port Talbot, y Lluoedd Arfog Prydeinig, Lleng Prydeinig Brenhinol Port Talbot a Chanolfan Siopa Aberafan.

Mae’r ŵyl wedi ei ariannu yn rhanno gan Llywodraeth y DU drwy Gronfa Ffyniant Gyffredin y DU.

I gael mwy o wybodaeth am yr ŵyl ewch i www.npt.gov.uk/gla .